政情：潮州商會就職禮多搞作

香港潮州商會今年搞搞新意，破例提早搞新一屆會董就職禮，下禮拜四（十六號）喺會展筵開逾百圍，順便宣布九十周年慶典活動揭幕。

潮州商會會長Ian陳幼南尋日預告嚟緊搞作多多，下禮拜嘅就職晚宴，將變身潮州之夜，唔止請賓客品嘗特色「潮菜」，仲有氣勢磅礡嘅潮汕大鑼鼓表演。潮州人原來好重視「成人禮」，稱之為「出花園」，嚟自揭陽嘅舞蹈團將以跳舞方式展現傳統習俗，新鮮感十足。

壓軸節目係美女模特兒着婚紗同晚裝行貓步，原來潮州有「中國婚紗之都」美譽，唔少出口歐美嘅婚紗都係「潮州製造」。透過連串表演，Ian話想令人感受到潮州商會嘅「潮」味，一啲都唔老餅。