政情：陳慧慧發聲明撐爸爸

南豐集團主席陳廷驊家族內訌，陳廷驊幼女陳慧慧同母親對簿公堂，忙於應付官司嘅佢，心情似乎冇受影響，日前喺港安醫院慈善基金會舉行嘅「小小英雄．音樂顯愛心」慈善音樂會，佢以陳廷驊基金會主席名義現身支持，該基金更特別捐助「港安醫院慈善基金」轄下嘅「港安幼苗心臟基金」，讓患有先天性心臟病嘅小朋友盡快接受治療。

捐錢之外，佢絕口不提家族事，直至尋日終於發聲明表露心聲。佢重申今次事件乃家庭私人事務，同集團日常業務運作冇關，希望各界喺佢哋呢個困難時期，畀佢爸爸多啲私隱同尊重。

陳慧慧指爸爸曾出任多項社會公職，七○年成立陳廷驊基金會，大力支持各種慈善服務，非常遺憾嘅係，爸爸後來患上腦退化症，二○○八年底正式退出集團工作。佢強調喺爸爸退休前，佢哋一直緊密攜手工作，共同開拓業務。

佢仲話，對今次事件被帶上法庭同公開報道感到十分遺憾，佢會致力解決一切問題，懇請各界畀佢爸爸保留多一啲私隱。