政情：鬍鬚曾翻生大軍閥

眼見熱錢不斷湧入，勢令樓市泡沫爆破，財爺鬍鬚曾早前急急出招，壓抑短期炒賣活動，其中一招收取額外印花稅適用範圍上，鬍鬚曾同運輸及房屋局局長Eva鄭汝樺嘅講法一時一樣，搞出好多混亂。立法會地產及建造界議員「大舊石」石禮謙好勞氣，狂轟鬍鬚曾好似大軍閥打麻雀，只係有佢講冇人講，唔單止講一套做一套，仲係夾硬嚟添！

話說尋日立法會房屋事務委員會傾到額外印花稅新措施，班議員愈講愈激動，最勞氣嘅係大舊石，佢炮轟鬍鬚曾宣布措施當日講明臨時買賣合約都係翌日起先計，但Eva第二日解釋措施就改口話所有臨時買賣合約，若冇必買必賣條款就算係生效日前簽落都唔計，但又冇解釋點解前後說法唔同，猶如軍閥打麻雀「小鳥食餅」，自己講晒。

單吊一索照食一筒

可能大家未必記得「小鳥食餅」嘅由來，大舊石就帶大家返去回味吓《大軍閥》呢套戲其中一個片段。

大舊石解釋話故事係講軍閥打牌單吊一索，但係等極都摸唔到又冇人打，心急起上嚟，上家打一筒都話要食，麻雀腳問軍閥點解食得，佢就答因為隻小鳥（一索）肚餓要食餅（一筒）。到咗下一鋪，軍閥打出一筒，下家想有樣學樣，用「小鳥食餅」呢招食胡，點知軍閥就話唔得，因為小鳥已經食飽！

時間所限，大舊石講唔晒成個古仔，其實仲有下文㗎！就係軍閥嘅麻雀腳再問：「咁小鳥幾時先食得餅？」軍閥就毫不客氣咁話：「小鳥幾時肚餓得我先至知！」

故事長係長啲，但要形容鬍鬚曾今次處理額外印花稅適用範圍爭議，真係一針見血，非常到肉！