財爺口噏當秘笈 添煩添亂要不得

財爺口噏當秘笈 添煩添亂要不得

樓市持續飆升,港府民望急挫,為咗平息民怨,當局上個月失驚無神推出穩定樓市措施,點知訊息亂過亂世佳人,業界同買家都無所適從,穩定樓市變咗搞亂個市。情況就好似大戰在即,指揮官通知各部六點鐘出擊,但冇講清楚係上晝定下晝。朝早六點一到,有人開槍打炮,有人照瞓大覺,咁搞法,梗係打敗仗啦。

今次嘅「懵炳司令」係財政司司長曾俊華。呢,佢上月十九日公布額外印花稅措施嗰陣,實牙實齒話翌日至生效。記者當場問,早前簽咗嘅臨時買賣合約都受影響,定係由二十日起至計算?鬍鬚曾答「明天起才計算」。

點知當局其後居然有另一個版本,話一般來講,臨時買賣合約冇約束力,亦唔能夠將物業嘅權益轉讓畀買家,法理上唔構成轉讓物業權益。即係話如果臨時買賣合約冇列明「必買必賣」,而簽署正式買賣合約係十一月二十日或之後,咁就受到新措施影響。

叮!嘴上冇毛就話辦事不牢啫,估唔到「二撇雞」講嘢一樣係九唔搭八。淨係措施生效日期已經混淆不清,叫市民聽邊個?信邊個?莫講市民一頭霧水,連法律界專家都唔知佢搞邊科。呢,香港律師會收到有關政策嘅通知文件之後,亦要求當局盡快釐清受新措施影響交易嘅確實定義。你話港府係咪靠害吖!

立法會議員王國興就鬧得啱嘞,印花稅措施轉變關係重大,居然由財爺一個人口頭宣布,正一「口噏當秘笈」。亦有議員指出,簽臨時買賣合約亦應算作業權轉讓,正如以往樓市大升,買家簽咗臨時買賣合約後已可以轉手獲利。各界意見紛紜,當局唔講清講楚,反而亂噏廿四,直頭係添煩添亂。

所以話,樓市亂象皆因港府而起。長實地產投資董事郭子威上月十九日根據鬍鬚曾當日公布嘅措施內容,喺個人微博上發布訊息,當局點講佢點寫,但事後被指不實。有市場人士認為,咁樣對郭子威並唔公平。

新措施除咗生效日期混淆,買賣雙方邊個負責印花稅同樣存在爭拗。有政黨表明會提修訂,訂明由賣方全部負責支付額外印花稅,並容許身患惡疾而被迫轉售物業人士豁免繳付額外印花稅。冇錯嘞,天有不測風雲,人有旦夕禍福,對因為突然變故急住賣樓套現嘅市民嚟講,有關措施猶如「七步斷魂散」,隨時會沙塵滾滾,殺錯良民。

計太一叮話齋,當局為「補鑊」急就章推出新措施煞停炒風,穩住樓市本來係好事,但閉門造車,事前冇同業界諮詢同溝通,加上考慮不周,計劃粗疏,卒之搞到七國咁亂,根本就係捉蟲!