SUN世代：Paco新寵唔唱歌持鑊鏟

劉銘佳是金牌經理人黃栢高（Paco）力捧的實力派新星，年紀輕輕就擁有私人舞台，可表演自家創作的作品。未聽過其新歌？其實他並非歌星，而是擁有五星級酒店背景、開設兩間意大利餐廳的主廚，名人都爭先一嘗其廚藝。這位「名人食堂」廚神自認「讀唔成書」，但很願意以自己成功故事告訴年輕人：「肯搏肯捱，總有人賞識！」

家境不佳、中一重讀、中三輟學、投身社會，劉銘佳（Ken）現年三十三歲，是經歷十足十迷失方向的青少年，雖做不成狀元，但憑巧手廚藝加入了九龍萬麗酒店做學徒。憶述初入廚體驗，他說有點搞笑：「七歲已跟阿嫲買餸，以前睇卡通片《伙頭智多星》，主角用風扇吹麵，我用呢個方法整撈麵，原來真係入味啲㗎喎！」

愛比賽學新嘢

學師數年，Ken在十九歲獲師傅推薦參加學徒廚藝比賽，對手都是年長十年的師兄，勝算甚低。沒有心理包袱，他盡情以新菜式參賽：「評判都懷疑我能力，有外籍評判問我係咪即席表演拉糖，我口快快答『Why not？』事實上我未做過餅房，唔識拉糖！」誇下海口需付出代價，Ken進行兩星期地獄式特訓，比賽當日猶如「上身」，超水準表現為他摘下冠軍。

後來，Ken轉投半島酒店，兩度參加烹飪比賽HOFEX，分別奪銀及金獎。這位「比賽達人」自言天生喜歡比賽：「不斷比賽先逼到自己學新嘢，如果唔係個腦會生草！贏輸都係經驗，唔付出邊有美好前景？」

身經百戰之後，Ken自薦到半島酒店內最頂級的餐廳Gaddi's，跟米芝蓮大廚David Goodridge學師。學滿師就想創業，因為關乎一個對母親的承諾。十六歲入行時，他曾跟母親說：「人哋話我做廚房仔無出息，不過就算我做，我都要做到No.1，我應承你一定會開到餐廳！」

Paco邀開餐廳

○九年Ken一償所願，在美孚自立門戶，命名為「Mia」，短時間內聲名大噪，為他帶來重要顧客Paco。原來Paco受青年事務委員會主席陳振彬所託，找年輕人到柴灣青年廣場開舖做開荒牛，「Paco仲搵人嚟試過幾次，最終邀請我去開設『Palco』。」Palco開業兩個多月，曾光顧的名人多不勝數。

不說不知，兩間舖的命名皆是意大利文，也別具意義，「Mia」解作「我的」，「Palco」則是「舞台」，合併起來就是我的舞台。Ken有幸擁有私家舞台，自覺幸運，也是青年人創業的成功示範。提到成功之道，他稱都是老生常談：「年輕人成日拎把尺去度吓付出咗幾多，其實做多啲就學多啲，唔怕蝕底總有一日有人賞識。」

KEN LAU小檔案

年齡：33歲

現職：美孚Mia Pasta Trattoria、柴灣青年廣場Palco Ristorante主廚

威水史：96年學徒廚藝比賽冠軍、 01年HOFEX比賽銀獎、 04年HOFEX比賽金獎

座右銘：肯搏肯捱，總會有人賞識