政情：鬍鬚曾兜圈預告唔派糖

財爺鬍鬚曾尋日喺網誌話，睇住電子動態版《清明上河圖》，可以感受到乜嘢叫做「敢想、敢幹」，一般人其實不時都會忽發奇想，但付諸實行嘅其實少之又少，圖內人物識行識走嘅《清明上河圖》好難能可貴咁話。

話鋒一轉，佢講番八月底訪問台灣，當時喺故宮博物院欣賞咗《翠玉白菜》。佢讚藝術家巧妙咁利用塊原材料顏色唔一致嘅特點，將佢雕成渾然天成嘅白菜同蚱蜢，實踐咗「量材就質」嘅特點喎。

其實仲有唔夠三個月，新一份財政預算案就會出台，香港經濟氣氛波譎雲詭，鬍鬚曾照計應該好唔得閒，但突然之間咁有閒情逸致寫埋啲藝術嘢，到底係乜嘢意思呢？唔知大家記唔記得，佢早前喺立法會財經事務委員會上面，開到口話自己無力抗通脹，兼且未必再派糖紓困。咁咪應晒《清明上河圖》「敢想、敢幹」嘅特點？係咪預告預算案冇料到呀？

再講，依家庫房水浸，坐擁大量盈餘，鬍鬚曾就應該好似佢提及嘅「量材就質」，放水紓困啦，仲喺度做守財奴，擺明自打嘴吧啫！