政情：搞搞政：譚Sir食住上搲康體撥款

喺申辦亞運嘅生死存亡之際，政府尋日空群而出派代表出席建仔搞嘅運動會，好明顯係想拉票啦！

十三名副局長同政治助理更加着晒全副武裝，做足準備，親身落場同建仔玩拔河同二人三足。政府隊起初同建仔隊鍊咗分幾鐘後敗北，但喺第二場只係短短五秒間就反勝對手，第三局仲以三局兩勝贏埋添！呢個結果係咪暗示，雖然依家政府喺申亞事宜上處於劣勢，但仲有機會反敗為勝呢？又係咪暗示建仔最後會轉軚支持，開綠燈畀政府申亞呢？

之不過，建仔主席譚耀宗喺致詞時，乘機當住班官面前「食住上」，大聲要求政府加建體育設施、推出「康體券」同免公眾泳池入場費。但事後譚Sir重申現階段建仔就申亞嘅立場未變，話該黨中委多次討論後，認為現時時機唔成熟，覺得政府做好配套先再申辦，成功率會高啲。

講開申亞，富貴黨主席劉健儀尋日亦說漏嘴，口快快咁話：「政府搞掂咗建仔，我哋就易話為啦！」佢事後補飛，強調富貴黨唔係跟建仔投票，只係因為佢哋喺立法會得三票，唔得政府重視啫！