政情：劉夢熊話莫獻醜申亞
政情：劉夢熊話莫獻醜申亞
近日因為幫「結石寶寶之父」趙連海出頭而聲名大噪嘅全國政協委員劉夢熊，尋日佢接受電台訪問時承認事後收到朋友嘅勸喻，叫佢「到此為止」，但佢本住「人無壓力輕飄飄，泰山壓頂不彎腰」嘅宗旨，堅決唔肯放棄。佢亦明白朋友勸佢只係出於職責所在，老婆亦有叫佢唔好咁激，因為「阿爺唔得罪得」。
劉夢熊喺節目中強調作為全國政協委員，自己有責任做番啲嘢。佢仲提到自己當年一條泳褲闖香江，將來希望可以出一本傳記體小說，問鼎諾貝爾文學獎添！
除咗趙連海外，佢仲講到香港申辦亞運同下屆特首嘅條件。佢認為香港以現時嘅人力物力財力，根本唔可以辦到一個可以同今屆廣州亞運相提並論嘅亞運，所以獻醜不如藏拙，應該將精力放喺解決民生問題上，等第時有閒錢先再諗。
