政情：項明生撮合中港打機族
政情：項明生撮合中港打機族
今時今日嘅後生仔，好多都會喺社交網站遊蕩，所以負責市場推廣嘅Sony PlayStation總經理兼旅遊作家James項明生一於瞓身落場玩，係今年年初建立咗個人嘅facebook，又玩微博，以接觸內地後生仔。
James話早前去中學演講，啲學生哥話佢聽「冇facebook就冇face」，令佢獲益良多，所以佢話廣告短片一定要搞鬼，唔可以再用傳統廣告思維。最近佢哋食正喺內地爆紅嘅真人版「三輪哥」條水，推出一套「港版三輪哥」網上短片，迅速喺年輕網民之間傳播開去，上個月尾仲攞咗金帆獎添！其實佢哋係宣傳新遊戲「功夫滑仔」。
尋日佢現身第九屆亞洲遊戲展嘅宣傳活動，事關Sony係最大參展商，今年佢邀請內地鍾意打機嘅宅男宅女來港同本港電車男女同場打機，睇吓可唔可以撮合中港情緣。
項明生視喺網上遊蕩為工作又係興趣，可謂一舉兩得。