政情：克勤仔讚電動Cooper好力
政情：克勤仔讚電動Cooper好力
德國寶馬（BMW）研發咗部多功能遙控電動跑車MINI Cooper，吸引唔少愛揸車又愛環保嘅人，連立法會議員陳克勤都試揸咗四日，大讚上斜有力又夠靜，但就擔心架車靜得滯，如果一時唔覺自己開咗引擎，一個唔小心可能會釀成意外喎！
克勤仔上禮拜五攞車，除咗用嚟代步，仲借埋畀黨友、立法會進出口界代表「象哥」黃定光試揸。克勤仔話佢哋揸去花園道政府山走一轉，上斜轉彎全部都有力，又定又靜，非常吸引，不過架車仲未公開發售，就算佢哋想買都要再等等。
克勤仔又話有車牌嘅市民如果想試揸吓架跑車，可以自己聯絡BMW，但就要先簽約，如有損毀要賠償。佢仲提大家，部車叉足電最多都只係行到一百三十公里，而依家戶外叉電站唔多，所以記得叉好電先好出街，否則揸揸吓冇電就麻煩喇！
克勤仔借部新「玩具」玩咗四日，今日到期還車。