政情：唔認鬧哪吒田少扮失憶

有傳近期高調復出救黨嘅富貴黨前主席田北俊，喺黨嘅內部會議上同佢徒弟、西貢區議員「哪吒」方國珊駁火，仲鬧到佢眼紅紅，搞到佢決定辭去新東支部主席。哪吒事後畀記者問起呢件事，佢講到好隱晦吓，咁另一個當事人田少又點呢？

田少尋日出席黨嘅集思會後見傳媒時強調從來冇鬧過哪吒，只係認為新東嘅版圖好大，除咗將軍澳呢個新區外，仲有好似上水、沙田同粉嶺等舊區，如果只有哪吒一個兼顧各區嘅話，就會太辛苦佢，亦會浪費好多時間 ；而且亦有唔少地區幹事向佢反映，認為新東現時有好多區都冇人做嘢，所以佢先決定同前黨副主席周梁淑怡到新東主持大局，為未來嘅選舉部署，佢斬釘截鐵咁話自己冇因而鬧過哪吒，仲話哪吒冇辭職喎！

田少同哪吒都話冇咁嘅事，咁點解會傳出呢啲嘢呢？抑或富貴黨因田二少退黨後已元氣大傷，費事一波未平，一波又起，唔知點收科，所以佢哋都扮失憶，當冇咗件事算呢？

Miriam證收到辭職信

之不過，呢頭田少扮失憶，嗰頭黨主席Miriam劉健儀就證實前晚已收到哪吒fax畀佢嘅辭職信。Miriam話，同哪吒初步了解過，知道佢想專注做佢地頭將軍澳區嘅工作，認為如果孭起新東主席一職，睇晒成個新東嘅話就會太吃力。

Miriam明顯唔想喺個黨有內憂外患時再有任何人事變動，佢話會再挽留哪吒，亦希望佢可以承擔更多責任，唔好只係關注自己地頭：「佢當初接受新東主席一職時，都知呢區唔止將軍澳啦，相信如果佢肯放多啲心機，一定會做得更好。」繼田二少退黨後，Miriam再次變咗夾心人，大家且看事態點發展啦！