復修計劃歎慢板 鬧市制水到天光

錯失咗欣賞電子動態版《清明上河圖》嘅機會？冇有怕，水務署有好介紹，喺港島布置咗規模更宏偉嘅「鬧市水箱陣」，同場加演「水車大巡遊」，市民可以帶埋膠桶水煲做「臨記」參與盛事。

港島東區多個大型屋苑因為「水管緊急維修工程」，由尋晚到今朝九點暫停食水供應。停水期間，當局喺區內設置多個大水箱供水，仲派水車喺受影響範圍內巡邏，隨時為水箱加水，認真大陣仗。

叮！水管緊急維修工程講白啲，即係爆水管要搶修。原來英皇道一條主要食水管嚴重漏水，要閂水掣更換。

最弊就係，水務署前日上晝已經知道要維修，但就拖到前晚至發布消息，唔少市民深夜至知會制水，根本冇時間準備，想去買個水桶，舖頭已經關門。

港島東鬧市冇食水供應，受影響居民超過十萬，如果係天時熱，不知幾多人要成晚腌鹹魚。有東區區議員踢爆，水務署早已經將出事嘅水管列入復修計劃，點知未換就發現嚴重滲漏，質疑工程延誤導致水管滲漏。水務署再次令市民失望，唔怪得畀人叫「水皮服務署」咯。

一條水管拖足幾年未換掂，仲要「臨尾香」，復修計劃改名做「龜爬工程」就差唔多。既然發現問題，愈早更換，需時愈短，至少唔使市民等水等天光。水務署等爆水管至處理，簡直係靠害！

話時話，水務署最叻就係歎慢板，話之你急到跳舞，照樣拖得就拖。呢，審計署上個月派政府部門衡工量值成績表，水務署被揭發監管失職，執漏不力，成為其中一個畀人插得最勁嘅部門。

管水衙門原來係嘥水罪魁，全港公共屋邨舊年滲漏流失嘅食水多達一千七百幾萬立方米，相當於八千個標準泳池用水量，折成水費係八千萬元。公帑大出血，源頭正正係水務署。漏得最離譜嘅屋邨，每日食水流失量可以裝滿兩個標準泳池，水務署○四年已經發現問題，但執漏工程到家陣仲未搞掂。

工程慢過龜爬不特止，連閂掣截水咁簡單嘅事都拖得就拖，上年度有上千次爆水管個案，近四分之一由發現問題到通知承辦商，要花三十分鐘以上。最誇張嗰次，爆喉超過十六個鐘至截水，兩萬幾立方米食水白白流走。

水務署明知水管老化嚴重都唔做嘢，係驚工程封路惹起不滿，費事孭鑊。計太一叮話齋，水管爆完又爆，除咗造成交通癱瘓，影響市民日常生活，每年仲流失價值數億元嘅食水。造成巨額公帑損失呢隻鑊，水務署一定孭硬！