Sun世代：快樂王子樂平凡

王爾德在百多年前寫下家傳戶曉的童話故事《快樂王子》（The Happy Prince），高大靚仔的葉瀚華，活脫脫是現實世界中的快樂王子。他是前經濟發展及勞工局局長葉澍堃幼子，畢業於英國劍橋大學，個性樂天開朗，而且熱心助人。現職大律師的他說：「我鍾意『對人』嘅工作，做律師就係為咗幫人！」

大律師予人嚴肅之感，二十八歲的葉瀚華（Ian）卻是例外。他愛玩愛笑，甚至有點孩子氣，甫坐下，即急不及待展示手提電腦內的相片，嚷着說：「呢啲係英國讀書時嘅相，係我最開心嘅日子！」

跟爸爸葉澍堃走訪酒莊

Ian是葉澍堃幼子，有個大他兩歲的哥哥，所謂孻仔孻心肝，Ian跟父親很親近。早前葉澍堃為電視台拍紅酒節目，他也黐實父親走訪法國多個酒莊：「受Daddy影響，我都好鍾意飲紅酒，最近開始寫專欄，不過我介紹嘅，梗係冇Daddy嗰啲咁貴啦，我推介嘅係百幾二百蚊一支。」他自爆最愛食茶餐廳、雲吞麵等美食，「唔係貴嘢先好食o架！」

說Ian像「快樂王子」，除了他有高大靚仔的「王子」外表，還因為他個性開朗，擁有一顆赤子之心。他十三歲就被送往英國讀書，○四年畢業於英國劍橋大學經濟系，憑他的學歷，若投身金融界，搵錢相信易過借火，但他卻選擇苦讀做律師。

愛幫人唔做金融當律師

原來在升讀大學前一年的gap year，他在美林做過一段日子：「做投資銀行係賺到錢，但日日對住一堆數字，唔係我嘅理想。我鍾意『對人』嘅工作，做律師可以幫人，有意義啲。」劍橋畢業後，他在倫敦修讀法律文憑，再在港大攻讀PCLL（法律課程），跟師傅一年，○七年正式成為執業大律師。他認真地說：「Daddy以前都想做律師，仲考埋試，但最終冇做到，我依家代佢完成心願，我諗佢好開心㗎。」

有個高官爸爸，Ian卻從未想過從政，但父親不怒自威的形象，卻令小時候的他怕怕：「佢唔使出聲，已經好有威嚴，我細個好驚佢，依家大個咗就梗係唔驚啦！」葉澍堃甚少責罵兒子，唯一一次是多年前的暑假：「臨返英國前幾日，我搏命去夜街，結果畀Daddy勁鬧，不過第二日Daddy仲買好多點心畀我食，令我覺得Daddy好錫我！」

葉瀚華小檔案

洋名：Ian

年齡：28歲

現職：大律師

學歷：英國劍橋大學經濟系文學士、The College of Law 深造文憑、香港大學PCLL

嗜好：紅酒、美食、話劇、鋼琴、象棋