政情：《鏡報》搞到連戰一身蟻
政情：《鏡報》搞到連戰一身蟻
國民黨榮譽主席連戰五年前展開和平之旅，曾踏足北京，見過國家領導人，從此成為兩岸關係嘅指標人物。由已故全國政協常委徐四民創辦嘅《鏡報》月刊最近一期報道，北京有意邀請連戰最快喺二○一三年擔任國家副主席，咁勁爆嘅消息一出，台灣政壇隨即鬧哄哄。
消息實在太震撼，但又冇明確載明消息來源，國民黨發言人蘇俊賓連點回應都傷腦筋，話呢個係一個「無厘頭」嘅資訊，佢唔知道點回應。陸委會副主委高長就話冇辦法查證消息屬實與否，但若連戰到北京做官，就係觸犯兩岸人民關係條例，係絕對唔可以嘅。
連戰大仔連勝文早前喺五都選舉中為國民黨候選人拉票時遭槍擊，外界或關心、或質疑，為此煩心不已，依家仲意外被扯到敏感嘅兩岸政治，所以，連戰辦公室尋日回應北京想搵連戰做國家副主席嘅消息時，都有啲哭笑不得，笑稱唔可能發生，不予置評。