政情：民主阿婆遲鈍自打嘴巴

政府喺十月底公布政改方案本地立法嘅建議，各政團早已分析建議嘅利弊，但係「民主阿婆」陳方安生就慢幾拍，尋日開記者會所講嘅觀點冇乜新意，仲要自打嘴巴。民主阿婆話區議會超級議席違反普選原則，但之後佢被問及會唔會參選超級區議會議席時，佢竟然笑笑口咁話：「如果我五十歲就去選！」真係乜都佢講晒，唔通五十歲去選超級議席，就唔違反普選原則咩！

終於都認老嘅民主阿婆仲對擔當泛民共主死心不息，指手畫腳咁叫白鴿黨同公文袋要好好哋坐低傾吓，睇吓可以點樣提升特首同立法會兩個選舉產生辦法嘅民主基礎。民主阿婆嘅影響力早已壽終正寢，佢嘅建議，兩大黨都唔領情，兩黨如果傾得埋欄，都唔使到今時今日等佢嚟開聲啦！對於佢嘅建議，公文袋話，如果白鴿黨可以接納公文袋嘅建議，咁就一定會同白鴿黨合作，但係白鴿黨一直都唔贊同呢個做法，所以民主阿婆亂咁建議，其實都係唔可行嘅。