政情：搞搞政：立會動議冇新意回帶又回帶

每逢禮拜三，立法會例會都會討論由議員動議不具立法效力嘅議案，前日就討論《全面檢討強制性公積金計劃》議案。咦！點解個個發言議員開場白都熟口熟面嘅？乜唔係同一立法年度唔可以重複提出相同議案㗎咩？

有留意立法會消息嘅應該發覺，議員近年提出嘅議案其實大同小異，嚟嚟去去都係同扶貧、社福政策同樓市等等有關嘅議案，重複又重複。翻查資料，立法會由上個立法年度開始至今，已經討論咗大大話話二十幾個同扶貧或社會福利政策有關嘅議案，而同樣備受關注嘅樓市、置業同教育政策等等議案都講過五次。

唔少接近立法會嘅人士都慨嘆，近年議員提出嘅動議辯論的確冇以前咁多元化同有創意。但公平啲講，呢個現象其實唔可以怪晒班議員，試問政府如果唔係講極唔聽，議員又點會重複又重複咁提出類似嘅議案吖，選民唔投訴，議員自己都悶啦！

雖然有人唔滿意議案嘅內容太過相似，好似三幅被咁，但中大政治及行政學系高級導師蔡子強就覺得呢個現象無可厚非，因為議案辯論的確可以令一啲政策由冇講到有，好似最低工資咁，所以雖然議案冇法律效力，但都係值得嘅。