政情：姚珏捐出「老拍檔」行善

新地非執董郭炳湘太太Wendy李天穎同著名小提琴家姚珏曾經做過隔籬鄰舍，依家佢哋又再走埋一齊，拍住上做善事。事關嚟緊Wendy擔任名譽贊助人暨主席嘅「生命熱線」，將會喺聖誕期間舉行嘅「姚珏All About Love全為愛音樂會」中，用其中一場舉行慈善專場，扣除開支後，其餘將捐畀「生命熱線」提供預防自殺服務，姚珏仲會將今次用嘅小提琴捐出嚟拍賣。

小提琴可以話係演奏家嘅最佳拍檔，姚珏今次捐出嚟嘅仲係跟咗佢十幾年嘅老拍檔，大家一齊去過好多地方演出，今次割愛捐琴，絕對係善心無限。

音樂會以愛為主題，會將荷里活電影中嘅經典樂章重新編曲，至於慈善專場，就會喺十二月二十六號Boxing Day舉行，所以「生命熱線」推出「聖誕同樂獻關愛」行動，呼籲企業捐款支持預防自殺工作，購買音樂門券做聖誕禮物鼓勵員工。咁有心思，難怪Wendy都話係「good idea」，仲響應買飛請員工睇騷添。