政情：曾智明煮客家菜饗家人

客家文化節尋日揭幕，同時舉行客家文化展覽同揭幕酒會，多個客家商會同團體都有代表出席，前全國人大常委曾憲梓同細仔香港嘉應商會會長Ricky曾智明、新界鄉議局主席劉皇發，仲有半個客家人、民政事務局前局長「肥平」何志平都有嚟撐場。

Ricky係文化節籌委會骨幹成員，仲對客家菜情有獨鍾，唔止識得食，間唔中都會落手煮番幾味。佢同爸爸曾憲梓一樣，鍾意食釀豆腐同紅炆豬肉，但至於邊款先係拿手小菜，佢就笑笑口唔肯透露，總之話好多味都識煮，得閒就會煮畀屋企人食，又話夾個好日子請記者試吓佢手勢添！

同場嘅發叔就話，食客家菜就等同飲水思源，最鍾意係釀涼瓜同滑豆腐，但平時應酬太多，好難餐餐都食客家菜，所以一有機會就會食多啲。雖然肥平唔識講客家話，但對食就好有研究，最鍾意就係鹽焗雞，佢仲話怕畀人話變相宣傳，點都唔肯講去開邊間舖頭幫襯。