政情：Rita明倒香港米

內地城市競爭力急速提升，外界擔心上海嘅強勁經濟增長遲早追上香港，尤其喺創新科技人才方面，香港已經輸咗成條街。香港資訊科技界近日廣泛流傳一個消息，話商務及經濟發展局局長Rita劉吳惠蘭早前率領資訊科技業界到訪上海世博期間，有原本打算喺香港設立電腦網絡公司嘅投資者，被上海嘅創新科技配套以及發展潛力深深吸引，Rita變相將商機拱手讓畀上海，咁即係倒香港米啫！

數碼港貽笑大方

Rita九月中帶領訪問團去上海出席「香港資訊及通訊科技周」活動，一心諗住推廣香港最新嘅資訊科技發展同數碼娛樂，當時仲有機會畀業界精英與上海同業分享交流，期間參觀過上海「創智天地」嘅促進技術革新同企業精神環境。正所謂「唔怕貨比貨，最怕唔識貨」，相比之下，香港嘅資訊科技發展環境真係相形見絀，講嚟講去得個科學園同數碼港，而數碼港更加得啖笑。

據聞有一、兩個隨團嘅業界投資者，見到上海創新科技嘅優勢及配套，原本諗住喺香港設立公司都要重新考慮，甚至打退堂鼓。立法會資訊科技界議員「IT豪」譚偉豪同互聯網專業協會政策委員會副主席馮德聰都證實有呢個消息，異口同聲批評香港嘅創新科技積弱，本身大學人才方面已經唔夠上海爭，配套設施又唔夠，搞訪問團變相為他人作嫁衣裳。

促設創新科技局

IT豪話：「今次事件已為本港嘅創新科技響起警號，但Rita卻有心無力，分別要搞旅遊、經濟、通訊，忙到冇時間搞創新科技，所以要成立創新科技局！」佢話正構思研究香港競爭力，完成報告後會送交政府同特首候選人，得唔到回應至考慮進一步行動。

咁即係話，若果政府仍然自我陶醉，毫無危機感嘅話，只會坐以待斃，唔該Rita打醒十二分精神，諗吓橋點樣提高香港嘅資訊科技發展、人才培訓同相關配套，否則香港同Rita都只會畀人當係垃圾咋！