長子：媽媽係重感情嘅女強人

【本報記者】「我媽媽咁樣無端端走咗，我哋有太多太多遺憾。」已故教育家陳樹渠長子、寶聲集團董事長陳燿璋接受本報專訪時表示，在子女心目中，母親陳麗玲是世上最了不起的女人：「我媽媽一生好傳奇、好特別，佢係一個好堅強好重感情嘅女強人。」陳燿璋憶述，父母生前非常恩愛，又很疼錫他和三個弟妹，一家六口的生活滿載幸福：「爸爸好鍾意媽媽，佢哋每日都爭取時間一齊，媽媽為咗陪爸爸先學做生意，去公幹應酬都出雙入對，好多時仲會帶埋我去。」可惜幸福的日子只維持十年，父親在陳燿璋十歲時便因心臟病離世。「爸爸突然離開，對我媽媽好大打擊，佢當時好傷心，但仲要撐起成頭家同接管公司，媽媽都唔敢喺我哋幾兄弟妹面前喊。」

留美受欺凌 母代出頭

陳燿璋說：「媽媽係嚴母，佢希望子女受多啲磨練、出去闖一下，所以初中時就送我去美國留學。嗰個年代中國人喺美國會被人欺負，我打電話同媽媽講，媽媽即刻飛過來向校長投訴，校方當然否認，但話口未完就有個同學向我擲汽水樽，點知掟到媽媽，媽媽即時負傷再找校長投訴，最後校方開除嗰個同學，之後欺凌事件都少咗。」這一幕，令陳燿璋非常難忘。當他碩士畢業返港，母親要他先到國際級企業打工，證明他夠實力，才回來打理家族生意。嚴母出孝兒，陳麗玲九八年患癌要到美國醫治，四名子女便輪流侍候在旁。

陳燿璋○四年正式接掌公司，陳麗玲終可退下來。「媽媽性格務實、平易近人，完全冇階級觀念，做事講求輕重緩急，呢幾方面好影響我。」陳麗玲離世已三年，陳燿璋思母之情未減半點，母親家中的房間和辦公室陳設，全部原封不動。「媽媽生前篤信觀音，依家我哋都依舊每日為觀音像奉水奉鮮花。」

陳麗玲有兩個願望未圓，一是見到長子成家立室，二是親手抱次子一對孫兒。「我都好遺憾未能夠畀媽媽見到我成家，而弟弟一對龍鳳胎响美國出世後，媽媽仲未見過就離開咗……」陳燿璋望着牆上母親的相片喃喃說，媽媽不但看不到胞弟燿陽在美國荷里活導演的電影，亦不能再和妹妹打麻雀。