短打長擊：超脫申亞 癡人說夢

德成局長在公眾諮詢最後倒數「瞓身衝刺」，拉了港隊運動員到立法會游說議員支持申亞，可惜德成局長不是甚麼良駒，否則咁有纏鬥力，我一定瞓身投注支持。

然而，德成局長一味叫議員唔好將申亞「政治化」，大呼開支已由四百多億元壓縮到六十億元，又話唔係「面子工程」，因為到時佢已不在其位，有功勞都唔關佢事。阿哥，你就冇眼睇，到時成功就話啫，有乜錯漏甩轆，難道狂嗌幾聲：德成力撐，安心咪呻！

香港事無大小都係「政治」事件。香港地位敏感，有學者指，香港只是中國轄下一特區，若單獨申亞，其他國家元首能否接受？唔通在開幕與閉幕同特首排排坐食果果？這不是太看得起自己嗎？

講真，政府在諮詢期間吹到申亞有百利而無一害，連民生都冇影響，幸好市民不買帳，皆因政府講一套做一套的實例太多了，在「狼來了」的效應下，政府再瞎吹只會適得其反。

真要不影響民生，就如有人問大師：「如何能做到既富有又聖潔？」大師說：「當金錢對他心靈的影響等同於那棵竹子的陰影對影子的影響時，就可以了。」弟子們轉身去看，竹子的陰影掃過院子，但沒有激起一粒塵埃。

申亞影響太大了，尤其當民生多艱，政府無力遏加風，扶貧無法，紓困無方，市民點會聽政府老點，申亞會「加強社會凝聚力」、「增強公民自豪感」。要是連高學歷的人士也搵唔到食，窮人數目高居不下，你話點振興體育？