彩報為禍神州 港粵淪為幫兇

內地賭風熾熱，彩毒蔓延全國，幾乎日日上演家破人亡嘅悲劇。歸根究柢，港產六合彩報畀人源源不絕走私北上，推波助瀾，荼毒同胞，直情係罪魁禍首。

彩報禍國殃民，港府熟視無睹，立法會議員劉江華睇唔過眼，質詢當局究竟有冇打擊及堵截走私六合彩報活動。你估保安局點回答吖嗱？官員話喎，海關今年頭十個月處理咗兩宗六合彩報走私案件。

唔係啩！走私六合彩報就算唔係日日發生，一個禮拜起碼都有幾次喇，當局十個月先至查處兩單咁大把，擺明就係失職甚至包庇。正如另一位立法會議員王國興話齋，當局根本係迴避問題，有推卸責任之嫌，佢要求港府嚴謹執法，除咗打擊不法之徒，更要嚴懲幕後主腦。

冇錯喇，正所謂擒賊先擒王，要打擊六合彩報走私活動，首先就要搵出幕後主腦。不過咯喎，如果有人故意包庇，助紂為虐，咁又唔同講法咯。

講到助紂為虐，不得不提影視處，今年六月，本報揭發三份港產六合彩報《創富》、《六合皇》及《貼士皇》違規更改承印人資料，涉嫌違反《本地報刊註冊條例》，負責監管嘅影視處慢條斯理將案件交由律政司跟進，警方早前卒以「報刊上未有印上承印人名稱及地址」罪名控告三報嘅出版人「創能有限公司」。表面上依法辦事，實際上一制兩法，告一間唔告一間，事關由淫賤黎擔任董事嘅承印人公司完全冇事，幕後主腦得到放生。

其實係人都知，出版人公司係形同空殼嘅「雞棚」，只係負責頂罪嘅「豬仔」，反而大發不義之財嘅幕後主腦就逍遙法外，請問呢啲係乜嘢法律呢？唔怪得有人指港府已淪為內地彩禍嘅幫兇，真係一啲都冇講錯。

講到幫兇，又點少得內地貪官裏應外合吖。呢，日前福州有人誤信六合彩網站可提供號碼貼士，被呃咗幾千元入會費，當事主發覺上當要求退款時，網站負責人居然發惡：「要報警就報吧，我讓公安先把你抓了！」惡得咁交關，唔通真係向官府交咗「保護費」？

貪官收保護費唔出奇，奇就奇在，淫賤黎靠誨淫誨盜、反中亂港起家，佢旗下嘅壹淫媒經常叫囂「天滅中共」、「結束一黨專政」，擺明同共產黨勢不兩立。但內地當局唔單止冇封殺，仲百般呵護，對壹淫媒報刊喺深圳等地賣通街隻眼開隻眼閉，連非法入境嘅六合彩報亦暢通無阻，問你服未。

不過咁，太一叮有個問題真係好想請教內地當局，佢哋放任六合彩報走私入境，萬一有人喺六合彩報夾雜大量反中亂港嘅刊物，譬如話煽動顛覆國家政權，又或者鼓吹台獨、藏獨以及疆獨，當局係咪照樣大開綠燈呢？

話時話，粵港經濟合作搞嚟搞去都搞唔出乜嘢花樣，但縱容壹淫媒同六合彩報走私，兩地就動作一致，唔通兩地官員真係有默契？唔通反中亂港先至有運行？叮！