政情：汪阿姐獲頒職訓局院士

著名藝員汪明荃縱橫演藝界四十年，佢嘅成績獲得好多機構認同，職業訓練局下星期頒授榮譽院士銜畀八位社會人士，汪阿姐又榜上有名。佢○七年曾獲城市大學頒授榮譽博士，上年又獲演藝學院頒授榮譽院士，今次已經係佢第二個榮譽院士銜頭。汪阿姐話，前兩次獲頒同演藝生涯有關，今次則較特別，係對佢多年嚟服務社會工作嘅認同，所以別具意義咁話。

職訓局下星期二舉行二○一○年度畢業禮，今年獲頒榮譽院士嘅人有八位，六人嚟自商界，好似中華煤氣企業人力資源總監鄭羅蕙芬同酒店業主聯會總幹事李漢城咁，一人嚟自傳媒界，汪阿姐係演藝界唯一「代表」。職訓局指，向八人頒銜，係表揚佢哋對推動專業培訓發展嘅貢獻。

以身作則終生學習嘅汪阿姐，一向支持職訓局工作，好似佢帶領嘅八和會館，就同職訓局合作開班，為投身粵劇界演員提供再培訓。職訓局方面就回應我哋話，汪阿姐獲院士，係因為佢鼓勵持續進修。