政情：朱漢輝最愛翠華魚湯米線
政情：朱漢輝最愛翠華魚湯米線
中環食肆多，唔同嘅人有唔同嘅選擇，大昌行集團副主席朱漢輝（Alex）就獨愛翠華餐廳嘅魚湯米線，盛讚湯底好好味，再加幾粒招牌魚蛋，令人回味無窮。
Alex話，佢唔識翠華集團主席李遠康，自己純粹係普通食客，而佢經常幫襯嘅翠華係位於中環威靈頓街嘅分店。佢解釋，自己成日喺對面嘅鏞記食飯，有時想食啲香港地道美食，就會過對面嘅翠華茶餐廳滿足一番，必食之選係魚湯米線，同埋香港好傳統、好出名嘅魚蛋。「魚蛋稱霸，咖喱稱王」正係翠華嘅招牌口號，Alex果然識揀識食。
講到食經，Alex又事先張揚遲啲集團會開拓中高檔嘅食品市場，包括有靚紅酒即場畀人試飲。
朱漢輝鍾意翠華餐廳嘅魚湯米線，盛讚湯底好好味。