政情:鐵頭仁生日冇人記得

政情:鐵頭仁生日冇人記得

立法會尋日舉行大會,適逢白鴿黨主席何俊仁五十九歲生日,但係佢啲黨友就一啲表示都冇,唔係唔知、就係唔記得。其實鐵頭仁進行緊個每周絕食行動,每逢禮拜三都會絕食到夜晚九點,以支持內地維權律師,為免生日活動多,佢特登提前一日絕食,點知返到立法會都冇蛋糕食。事後啲黨友良心發現齊齊同佢食飯慶祝喇,又輪到鐵頭仁要喺立法會發言,結果整定佢冇生日大餐食!

尋日無論係白鴿黨黨團召集人李華明,定係同鐵頭仁一齊入中聯辦談判嘅張文光同劉慧卿,冇人知道鐵頭仁生日,第一個反應仲係:「乜佢今日生日咩?」黃成智仲話連自己生日都唔記得,冇乜可能記得仁哥生日喎!最後高達提議大家一齊出去食飯,唔使鐵頭仁孤獨咁唱生日歌。

鐵頭仁話,佢已經提前一日絕食,尋日除咗同黨友食餐好嘅外,會後都會返屋企同老婆撐枱腳!依家學緊做潮人嘅鐵頭仁尋日又喺facebook留言,佢話,從來都唔覺得生日值得慶祝,依家內地有好多異見人士依然處處受限,佢最大嘅生日願望都係希望人人都有選擇的自由喎!