政情：李嘉誠膺十大新聞人物

政商界風頭躉特別多，華爾街日報尋日公布今年度商界十大頭條新聞人物，富商李嘉誠、捲入天匯取消交易風波嘅「四叔」李兆基、身體狀況一直備受關注嘅「賭王」何鴻燊，同埋因電盈私有化投票捲入涉嫌種票事件，警方到其三個住處搜證嘅電盈主席李澤楷都上榜。

賭王獲大紫荊勳章喜事重重

華爾街日報話，李超人上榜係因為今年買下英國三間能源巨企，成為英國能源基建嘅最大擁有者之一，而喺香港，李超人嘅「香港仁．愛香港」公益行動亦開始好活躍咁做善事，受人關注。恒地主席李兆基上榜嘅原因，係旗下天匯撻訂事件遭警方調查，被立法會議員質疑，另外四叔大兒子李家傑早前搵代母生咗三個金叵羅，四叔抱男孫，唔少市民都睇過佢張笑到見牙唔見眼嘅抱孫照同相關嘅頭條新聞。

新世界發展董事總經理鄭家純抨擊政府嘅打擊樓市措施，指會令樓市大跌，另外，新世界百貨年初宣布會在內地開六間分店，令身為集團總舵手嘅鄭裕彤進身「十大」。「賭王」何鴻燊上年病倒入院，身體狀況一直受人關注，早前出席禮賓府嘅大紫荊勳章頒授儀式，近日又高價購入白松露，喜事重重。

李澤楷亦因捲入懷疑種票事件、同埋購入AIG嘅投資公司，進軍財富管理業務轟動一時，加上前藝人梁洛施今年為他誕下雙胞胎。

另外上榜嘅仲有經歷高層人事變動嘅滙豐控股高層、將黯然離職嘅行政總裁紀勤，同接替佢嘅滙控候任行政總裁歐智華。而香港交易所亦有二人登榜，一個係主席夏佳理，一個係行政總裁李小加。