政情：富貴黨反面

分手未必係朋友，原屬自由黨嘅田北辰早前高調退黨，曾經同主席劉健儀（Miriam）握手言歡，話彼此有共識，唔會喺選舉上敵對。言猶在耳，田二少就話咁快同匯賢智庫主席葉劉淑儀眉來眼去，仲正式「相睇」埋，結果新人嬌笑時，舊人Miriam尋日就喺立法會內大發雌威，差在未揚鞭立誓，話明田二少改嫁後，自由黨就唔會再畀「贍養費」，即係唔會送票撐佢選立法會！

葉劉「相睇」印象唔錯

Miriam呢句絕情警告，擺明係同負心人攤牌，亦粉碎咗田二少呢邊擁舊愛，嗰邊得新歡進軍二○一二年新界西直選嘅好夢，二少今次分分鐘偷雞唔到蝕揸米。正同田二少蜜運嘅葉劉尋日亦首次品評新歡，話同田二少「相睇」咗一次，印象唔錯。

葉劉仲講笑話，經營G2000嘅田二少應有大量T恤做「嫁妝」，又話大家係成年人，唔怕「結婚」後成日嗌交。葉劉講起佢哋嘅接觸，充滿彼此暗通款曲嘅繾綣情懷，一啲都冇面紅。

拒效建仔選票無回頭

另一邊嘅Miriam發威之餘，亦勇敢面對田二少移情別戀，言明如果田二少獨身，幫佢助選仲有得傾，但如改嫁咗，自由黨無理由派人支持其他政黨嘅候選人咁搞笑㗎嘛。富貴黨原本諗住好嚟好去，支持田二少喺新界西參選，大家謀求另類合作啫，但佢另結新歡，富貴黨就驚重演當年建仔喺港島助葉劉一役，選票一去無回頭，既輸感情又輸席位，何苦呢？

離咗婚嘅人改嫁都攞唔到前夫嘅贍養費嘞，更何況政壇如戰場，讓一票分分鐘失一席，富貴黨家吓危機重重，點可能為變心嘅田二少作嫁衣裳呢？呢次攤牌後，富貴黨同田二少喺競選場相見，睇怕唔止火併咁簡單！