中成藥亂上加亂 衞生署靠害市民

本港中成藥市場不嬲無王管，所有中成藥無論有冇註冊，都可以大模廝樣售賣。咁搞法有乜法子唔出事，所以周不時有人中招，冇病變有病，小病變大病，大病變冇命。

各界一早就呼籲政府加強監管，早日結束亂局，大家望穿秋水，終於等到呢一日嘞，《中醫藥條例》有關本港市面售賣中成藥必須註冊嘅規定本周五起實施，任何人銷售、進口或者管有未經註冊中成藥，即屬違法，最高罰款十萬元，監禁兩年。

正所謂治亂世用重典，睇怕可以執番掂中成藥市場喇啩？不過唔好太開心住，講唔埋第日坐監嗰個唔係刻意售賣未經註冊中成藥嘅奸商，而係無辜市民。

因乜事會咁嘅呢？事關衞生署做法亂晒大龍，十一月十七日先至通告有關規定於十二月三日正式實施，加上又冇認真做宣傳，大多數市民都矇查查。即管出街問吓途人，保證十有八九唔知有呢回事。

咁就弊傢伙嘞，好多香港人都會買中成藥睇門口，按法例規定，市民屋企嘅中成藥未經註冊，或者從境外購買大量中成藥自用或者送禮，嚴格嚟講都違法，但唔係銷售用途就可以免受檢控。問題係，法例冇訂明屋企管有或喺境外購買幾多未經註冊中成藥至係違法，市民隨時會誤墮法網。

有機會中招嘅唔止普通市民，連中醫都自身難保。衞生署只喺網上公布註冊中成藥清單，直情玩死老中醫，佢哋多數唔識上網，點知邊啲中成藥有註冊呀？如果買咗未經註冊嘅中成藥，又處方畀病人服用，咁咪大鑊！臨老惹官非，好慘o架！衞生署署長林秉恩，唔好咁大整蠱啦！

仲有，市民買中成藥嘅時候，點知啲藥有冇註冊呀？本來《中藥規例》規定，中成藥包裝上面要印有註冊編號，買藥時可以一目了然。問題係，《中藥規例》要等出年十二月先至推出，即係話，市民喺未來一年中，都冇可能喺包裝上面知道自己買嘅中成藥有冇註冊。政府咁搞法，直情係靠害啫！叮！

冰凍三尺，非一日之寒，中成藥市場今時今日七國咁亂，多得政府長期監管不力。就講《中醫藥條例》，本來九九年就已經通過，後來又按照條例推行中成藥註冊，共收到一萬六千幾宗申請，其中有五千幾宗被拒註冊，但係法例並冇規定即時禁售，令呢啲未經註冊嘅中成藥通行無阻。家陣罰則終於生效嘞，本來係撥亂反正嘅好機會，點知畀衞生署班庸官咁樣一搞，好事變壞事，反而亂上加亂。

今次政府整治未經註冊中成藥，法例漏洞百出，實施又亂晒大龍，直情係添煩添亂。最終受害嘅係市民，佢哋唔單止要繼續受未經註冊中成藥威脅，仲有機會誤墮法網。林秉恩連咁簡單嘅事都搞到一鑊泡，仲好意思霸住個位嘅，唔該收皮罷啦。叮佢個鎯鎯！