政情：劉秀成搞全男秘密飯局
政情：劉秀成搞全男秘密飯局
尋晚七點，記者發現七名立法會男議員喺中環新世界大廈翠亨邨酒家搞「密會」。搞乜咁秘密？原來係專業會議劉秀成以立法會發展事務委員會主席身份請班委員食飯，呢個係秉承前任主席嘅傳統，即係「半被迫」請客。
十九名委員中，出席飯局嘅有「IQ博士」黃宜弘、旅遊界謝偉俊、白鴿黨甘乃威、工程界何鍾泰、石禮謙，仲有稀客霍震霆同委員會秘書，未夠開會法定人數，但筵席照上菜。問佢哋係咪變定期聚會時，IQ博士笑騎騎咁話：「係呀，每月一次！」劉秀成跟住有啲尷尬咁講：「可能啦，到時AA制。」成場人即時爆笑。
議會獨行俠霍公子，早前罕有出席建制派定期飯局，為香港申辦亞運會游說護航，但未見成效，佢尋晚又抽空出席，梗係志不在食飯啦。據聞佢喺席間不斷向大家軟銷申亞，雖然大家冇乜反應，但佢都照講足大半場。