政情：楊哲安心雄踩單車返工
政情：楊哲安心雄踩單車返工
港隊運動員早前喺廣州亞運會破紀錄取得八金嘅佳績，民政事務局局長曾德成只識借金牌運動員hard sell申亞，反而教育局政治助理Jeremy楊哲安就有另一番體會。
Jeremy尋日出席一個名為「綠色救地球」嘅活動，向在場中小學生分享佢對環保嘅心得。佢自爆見到單車健兒奪標後，激起佢決定踩單車返工嘅念頭，希望可以為環保出分綿力，佢更特登帶埋架「戰車」到場，仲即席喺台上露兩手添！
佢話近期開始實行「單車大計」，目標係一年減用一百公升油，為咗呢個「創舉」，仲專登喺網上計劃好路程。佢笑言自己唔係黃金寶，由於回程時要上斜，如果踩單車嘅話，分分鐘返唔到屋企，所以故意買部可摺式單車，等佢放工時可以「棄單車坐汽車」喎。