政情：搞搞政：田二少拍葉劉甘做阿二

匯賢智庫主席葉劉淑儀有意籌組政黨，而田北辰早前退出富貴黨後，旋即傳出佢有意加盟葉劉嘅新政黨，外界都半信半疑。正當政圈都唔睇好佢哋拍得埋之際，事態近日有新發展。

惺惺相惜眉來眼去

知情人士話，如果田二少嘅從政目標係要做阿一，就會揀繼續留喺富貴黨，等到二○一二年立法會直選，一旦喺新界西勝出，就可以統領富貴黨啦！依家佢寧願退黨，就唔會計較名分，「最緊要大家有傾有講」。了解田二少嘅人話，佢好欣賞葉劉喺反對舊樓強拍一役捍衞公義，所以退出富貴黨近兩個禮拜嘅佢已正式接觸葉劉，商討加盟新黨嘅可能性，依家雙方喺度眉來眼去，田二少係咪「入贅」葉劉個新黨，十日八日內會有分曉。

田二少為組黨唔介意改名叫田阿二，葉劉組黨又物色緊副主席人選，照目前形勢睇，田二少搭上葉劉呢趟組黨順風車，唔係冇可能。只不過，田二少同葉劉作風都咁剛烈，即使佢哋合作，日後會唔會火星撞地球，又或者「因了解而分開」呢？又會唔會好似好多火爆新人咁，為派喜帖、請賓客一類瑣事爭論不休，最終未行禮就一拍兩散？依家政界人士都擔定櫈仔，等睇好戲。

葉劉接受我哋查詢時承認的確同田二少傾緊加盟之事，但對於成事與否，佢就大賣關子，話未有定案。