政情：阿涂買樓給愛妻一個家
政情：阿涂買樓給愛妻一個家
立法會議員涂謹申喺舊年十二月十二號十二點十二分迎娶做公關嘅第二任太太蘇麗芬，阿涂尋日出席婚宴活動大談新婚感受，大會仲送咗支珍貴嘅鹿茸畀佢補身，佢坦言呢一年個人開心咗好多，仲話：「好多人話我個人精神咗，塊面都冇以前咁黑！」
阿涂話太太以前係做記者，所以特別明白佢工作嘅苦與樂，可以互相鼓勵，「好多嘢佢一講就明，就算未講佢都會自動睇電視，仲會評論吓我講嘅嘢添！」但係大家都係大忙人，點樣分配時間見面呢？佢話惟有寓拍拖於工作，例如之前參加「鼠戰中環」活動，咁啱太太就係大會公關，咪可以成日見面囉！
佢仲透露啱啱今年八月買咗樓，第二次做業主，雖然樓市高企，但佢認為一個穩定嘅家對女人好重要，所以貴啲都唔介意。估唔到平時一本正經嘅阿涂原來係廿四孝老公，唔知佢幾時有機會做廿四孝老竇呢？
阿涂出席婚宴活動，收到支珍貴嘅鹿茸補身。