政情：立會吹雞搵律師

以前成日都聽到有人講，話二十一世紀嘅戰場只在於法庭，呢句說話有幾真？睇吓立法會嘅情況就會知。律師會最新嘅會員通訊顯示，立法會秘書處正籌備新一份律師行備用名單，專門就立法會要面對嘅司法覆核、工程招標等問題提供法律意見，歡迎有興趣嘅律師行先向秘書處登記同提交如收費等資料，方便立法會有需要時可以即刻搵人。秘書處點解忽然要統籌律師行名單仲係一個謎，但立法會嚟緊兩年好有可能面對多單官司，所以秘書處未雨綢繆實冇錯。

梁展文提司法覆核反擊

今屆立法會可謂係多事之秋，要處理嘅事務既繁複又棘手，仲單單都可以變成對簿公堂嘅計時炸彈。好似前房屋及規劃地政局常秘梁展文離職後獲批入主新世界中國，相關委員會下禮拜會出報告，但政圈早已盛傳梁展文會喺報告公布後司法覆核立法會，咁立法會秘書長吳文華都要搵律師準備開戰，到時立法會嘅律師行名單就會大派用場。

正如立法會喺十月通過廢除擴建堆積區法令，政府亦好有可能提出司法覆核，挑戰立法會權力，成為首宗立法會同政府開戰個案。咁都不特止，調查雷曼爆煲嘅委員會同樣隨時出事，事關雷曼小組揀咗六間銀行嚟審，牽涉無數銀行高層同前線員工，只要其中一個人覺得冇理由畀立法會照肺，亦有機會再掀起一連串訴訟。再加埋政府遲啲會提交有關限制議員辭職再補選嘅修正案，相信立法會好容易夠票通過，之前有份辭職搞變相「公投」嘅議員已經放晒風，話一定會提司法覆核，立法會又會再度成為箭靶，所以依家搵定律師絕對唔係杞人憂天。

訴訟費用隨時唔止一億

其實除咗搵律師備戰，秘書處都係時候諗埋經費問題，事關立法會嘅儲備得大約一億元，如果要處理咁多單官司，呢筆錢絕對唔夠用，如果唔諗掂點找數，到時可能搵到律師都打唔到官司喎！