縮骨政府出茅招 硬銷申亞爛方案

香港代表隊弘揚自強不息、不言放棄嘅香港精神，揚威廣州亞運會，勇奪八金十五銀十七銅，打破歷來參與亞運紀錄。香港運動健兒好嘢！

香港運動員的而且確值得大讚特讚，事關呢啲獎來之不易。講真，香港運動員攞獎比其他地區運動員難得多，人哋要經費有經費，要場地有場地，生活無憂，出外比賽亦由政府埋單。但香港運動員就乜都靠自己，外出比賽政府最多出幾成旅費，運動員慳飲慳食，住低級賓館，仲要減參賽項目，不知幾慘情。難怪有人話，香港運動員外出比賽，就好似孤兒仔咁淒涼。

港府高官平時根本當運動員冇到，等到運動員喺亞運會爭金奪銀，傳媒排住隊採訪嘞，佢哋先至忽然發現「香港運動員令人感動」，爭住去賽場打氣，做騷做到七情上面，好似攞獎嗰個唔係運動員，而係佢哋自己咁。但係比賽一結束，高官嘅健忘症又復發，呢，香港代表隊前日凱旋歸來，居然冇高官到場迎接，場面冷清，令人不忍卒睹。

不過，呢兩日班高官又諗番起班運動員嘞。事關申辦亞運諮詢活動聽日就結束，政府尋日最後衝刺。香港亞運代表隊傾巢出動，操入立法會游說尊貴嘅議員。

話時話，政府呢一招夠晒蠱惑，申辦亞運計劃已受到大多數市民反對，立法會各政黨亦講到明會否決。政府高官匿喺後面，將載譽歸來嘅運動員推上第一線，要佢哋同議員交鋒，實在係茅招。難怪有議員直斥民政事務局局長曾德成將申辦亞運問題政治化。叮！

運動員希望香港主辦亞運，實屬無可厚非，事關政府成日話要發展體育事業，但又口爽荷包立，縮骨到痹。家陣話要申辦亞運，希望可以搭順風車，令政府增撥資源支持體育運動。

有運動員話睇見議員唔支持申亞，直言好傷心。之不過，佢哋可能有所不知，無論係市民抑或係議員，絕對唔會反對政府增撥資源發展體育事業，大家只係反對政府亂掟巨額公帑，賺取十幾日嘅輝煌。正如有立法會議員話齋，議員唔係攔路虎，如果政府嘅方案有成效都會支持，問題係政府嘅爛方案冇成效吖嘛！

運動員要喺亞運會攞獎，並唔在於亞運由邊個城市主辦，只要有實力，喺廣州可以攞獎，喺其他城市照樣可以。毛爺爺早就講過，世間一切事物中，人係第一個可寶貴嘅。所以，如果想香港代表隊揚威國際體壇，就要培養多啲頂級運動員，否則再主辦多幾屆亞運會都係嘥氣嘅。

其實，如果香港放棄申辦亞運，就可以慳番大筆公帑，拎其中一部分出嚟資助運動員，就可以培養大批尖子。呢條數連小學生都難唔到，但係港府官員偏偏唔識計？當然唔係，佢哋根本係好大喜功。叮！