政情：搞搞政：劉夢熊賣樓夠選超級議席

早幾日都講過，近期因內地「結石寶寶之父」趙連海案而人氣急升嘅全國政協委員劉夢熊，依家實立法會功能組別區議會嘅「超級議席」。根據政府建議，選舉經費上限為六百萬元，好多細黨叫苦連天，仲話選超級區議會肯定會破產，要求政府畀多啲補貼，但係呢筆選舉經費，對本身係上市公司主席嘅劉夢熊嚟講，真係濕濕碎。

劉夢熊日前出席一個敦煌籌款晚會時話，自己鍾意投資豪宅，好似早年用一千八百六十萬元買入禮頓山一個二千二百幾呎單位自住，○七年佢一家搬進一號銀海兩個共三千呎相連單位後，禮頓山嘅單位就攞嚟收租，舊年六月有大陸客洽購，最後以一筆過現金四千三百萬元易手，帳面即賺二千四百幾萬元。如果劉夢熊攞呢筆錢選超級區議會，足足可以選四次咁多。

佢話物業投資一向交畀太太處理，賣禮頓山收番嗰四千幾萬元，全數送晒畀老婆，認真闊佬。不過，依家政府落重藥壓抑樓價，問佢手頭上仲有冇物業投資，佢就話一切交畀太太處理，佢唔係太清楚喎！