政情：陳裕光入臨資會自讚100分
政情：陳裕光入臨資會自讚100分
經歷之前扣飯鐘錢一役，大家樂公眾形象插水，集團主席陳裕光更成為眾矢之的，尋日大家樂喺風波後首次公布業績，佢仲承認喺扣飯鐘錢上，自己政治智慧不足，當大家樂係茶餐廳仔咁經營，意識唔到公眾對大家樂期望咁高，「有帶頭作用」，又話諗住自己就快退休，公司業務交晒畀管理層打理。
咁講法，佢咪即係將扣飯鐘錢問題卸晒畀班下屬，但又兜個圈講到大家樂好似行內龍頭咁款，仲唔係自抬身價？
有記者叫佢為擔任臨時最低工資委員會委員嘅表現評分，佢話值一百分，但外界喺扣飯鐘錢事件上對佢嘅評價，同佢喺臨資會嘅投入程度唔成正比，覺得有啲委屈，佢唔肯正面回應會唔會繼續做委員，只係話自己一把年紀，唔適合做粗重工夫。
「做足一百分」只係大家樂嘅宣傳口號，陳裕光竟然乘機賣廣告喎！