政情：柯清輝嘆賓架淪過街老鼠

中策集團行政總裁柯清輝早前抽空出席福建社團聯會青委會搞嘅「不同領域可持續領域發展」座談時，透露近期得閒打吓高爾夫球之餘，仲好積極返內地搵投資項目，睇吓有冇搵錢機會。

柯清輝本身都係福建人，囝囝都係呢個青委會成員，班福建籍年輕人請到，自然要撐場。講起中策，佢直話直說：「收咗人工，點都要做吓嘢嘅！」不過，佢話依家好嘅投資項目唔易搵到，但又唔代表完全冇嘅，只係要好細心去搵先至有，總之慢慢來，財不入急門喎！

講番收購南山人壽告吹，佢解釋，喺佢未入職中策前，中策已有收購意向。佢話其實今次收購價錢唔算平，交易亦急咗少少，但收購唔成都並非壞事，要睇吓南山人壽將來發展成點先可下定論。

佢仲有感而發話，當年加入銀行業算係好彩，事關經歷過銀行嘅黃金歲月，但依家銀行經營環境已大大不同，特別係金融海嘯之後，銀行面對好多挑戰。佢又話：「當初做銀行家地位好高，但今日銀行家就好似過街老鼠，『貪婪』變成銀行家嘅代名詞。」唔知佢啲銀行業後輩可有同感？