政情：新官上任唔夠粒鐘 卓永興辣慶工會

卓永興在任食物環境衞生署署長時，署方甩漏問題不絕畀外界鬧爆之外，佢仲出晒名同員工關係惡劣，最諷刺嘅係佢偏偏被調去專責處理勞資糾紛嘅勞工處做處長，早前更加有多個工會好唔滿意呢個安排，仲叫政府換人，雖然佢嘅同僚都有幫口講幾句好話，點知佢尋日履新唔夠一粒鐘就爆大鑊。

佢尋日朝八點半左右就返到上環海港政府大樓，比返工時間早咗半個鐘，仲發表咗幾句好官腔嘅開場白。佢話勞工處係實務同有意義嘅部門，未來嘅工作好重要，包括最低工資同標準工時嘅立法，又話促進勞工福利同保障工人權益，要靠勞、資同政府三方合作，承諾會做好喎。不過，當記者問佢有冇幫助改善勞資關係嘅良策，佢就即時轉身走夾唔抖。

鎖阻入大廈

返到辦公室位都未坐暖，港九工團聯合總會一行七人就到場請願，佢哋想同新上任嘅卓永興打個招呼，同表達希望政府全面檢討勞工法例嘅訴求，但請願人士喺地下大堂已經被數名保安阻撓進入大廈，話請願區喺大廈外面，唔准上勞工處喎。

工團擺明係嚟贈興，嚟得請願嘅自然唔係善男信女，兩三個閃身已成功突圍仲入埋，但保安亦唔蠢即時鎖應變，期間轉咗兩部都被保安鎖晒，雙方有少少火藥味，請願人士質疑，以往都可以上勞工處遞交請願信，點解今次唔得，即場炮轟卓永興歧視工會同拒收請願信，將勞工處變成官僚部門。

拒親接請願信

擾攘一輪後保安終於放行，請願人士就直殺上勞工處，並誠邀卓永興出嚟接收請願信，但勞工處只係派代表收信，話處長開緊會唔得閒喎！

明知喺一片罵聲中履新，卓永興理應同啲工會疏通好關係先係上上之策，見個面收封信打個招呼有幾難？但喺處理同員工關係上臭名遠播嘅卓永興偏偏採取下策，竟然拉閘封嚟對待，究竟佢係擺官威抑或縮埋驚咗班工會代表呀？咁就真係佢自己先知，但係上任唔夠一個鐘頭就辣着啲火頭，開壞咗個頭，因住遲早有日引火自焚呀！