港府懶監管 又見零團費

記得惡導遊阿珍成名金句「你這輩子不還，下輩子也要還出來」嗎？查實唔使等下輩子，再有內地同胞焗住參加「還債之旅」，香港旅遊業已經現眼報啦。

「香港一日遊」六十八蚊有交易，豪華團不過畀多廿蚊。先遊金紫荊廣場，再上太平山；兜轉港島再逛九龍；青馬大橋唔少得，黃大仙唔會錯過，仲加埋海洋公園同迪士尼添。全程觀光巴士加導遊，食飯上酒樓，直頭超晒值。

老作？廣告寫得清清楚楚㗎。不過咁，稍微用吓腦都知係「不可能的任務」啦。呢，有內地傳媒唔信咁大隻蛤乸隨街跳，搵記者放蛇跟團，果然有蠱惑，發現貨不對辦「三宗罪」，包括行程縮水、購物欺詐同收費不一等。

呢嗱，成團人坐旅遊巴過咗香港，好似賣豬仔咁轉畀間本地旅行社。當日行程同廣告有相當大出入，連遊客最想睇嘅尖沙咀星光大道都冇去，到咗海洋公園淨係喺正門逛吓就上車走人。

兜咗一輪，戲肉終於上場。團友被安排到紅磡一間「國際免稅店」購物，導遊話嗰度「價格公道」，但購物就毫無自由，好似變相禁閉咁，唔能夠隨便離開。穿過一道道暗門，睇完珠寶睇手錶，跟住仲有相機、藥物同保健品，一於漁翁撒網冇放過。

當日有好幾個內地旅行團喺嗰度購物，行程差唔多，都係要買嘢，但唔同旅行社收費差好幾倍，遊客大叫搵笨，亦有遊客投訴食得好差，完全物非所值。

叮！幾十蚊一日，包車費雜費仲食兩餐，如果冇遊客購物佣金幫補，一定蝕硬要倒貼，你話係咪變相「零團費」旅行團呀！內地同胞對阿珍副母夜叉嘴臉記憶猶新，旅遊業界惡習又死灰復燃，政府到底有冇監管㗎？

好多內地遊客都非常不滿，後悔參加，但冇諗過投訴，只係話自己唔好彩，下次唔會再嚟。唔該港府高官豎起耳仔聽吓啦，唔投訴不等於冇問題，遊客話冇下次，隨時出現連鎖反應，返內地同親朋戚友講起不愉快經歷，一傳十，十傳百，邊個仲夠膽嚟香港吖？

旅遊業議會推出規管業界十項措施唔到兩個月，「購物天堂」形象仲未恢復，零團費又捲土重來，本港旅遊業監管又響警鐘。事實再次證明，當局靠旅遊業界自律嘅監管模式係一廂情願，根本行唔通。

最搞笑就係，當局話過會用放蛇方式防止有人違規，但一直食白果，呢次反而由內地傳媒捷足先登發現問題，你話羞唔羞家吖？計太一叮話齋，港府平時唔做嘢，做嘢就蛇王，靠呢班懶官監管旅遊業挽回遊客信心，正一蚊都瞓，蛇都死啦。叮！