政情：龐愛蘭搵王浩信鼓勵囝囝

仁濟醫院同康復諮詢委員會一眾名人成員尋日同一班傷殘人士、義工及照顧者齊齊去迪士尼樂園玩，公務多多嘅Scarlett龐愛蘭都以康諮會成員身份出席，佢仲趁機捉住囝囝嘅偶像、藝人Vincent王浩信寫咗封鼓勵信畀囝囝添！

原來Scarlett囝囝好鍾意Vincent喺電視劇《刑警》入邊嘅角色，覺得係正義嘅化身，咁啱囝囝即將去澳洲讀醫科，正面臨人生嘅重要時刻，所以佢搵Vincent寫封信鼓勵吓囝囝。Vincent二話不說，洋洋灑灑寫滿一張A4紙，佢話自己以前都收過張學友嘅鼓勵信，深知自己唔為意嘅幾句說話可以產生深遠影響，所以義不容辭。

尋日係傷健關愛大獎頒獎禮大日子，仁濟主席董吳玲玲一身輕便打扮撐場，仁濟副主席李文斌同哥哥、康諮會副主席李文俊以兄弟檔上陣，李文俊曾任仁濟主席，兩兄弟尋日都暫時拋下屋企幾個月大嘅BB拍住上做善事。