政情：搞搞政：畀麒伯飛起劉吳惠蘭有排煩

廣播處長黃華麒曾一度盛傳獲政府首肯續約，點知結局竟然係另一個版本，於是乎香港電台又要換台長。

麒伯續約問題迂迴曲折，最早喺十月中傳出佢向政府表明唔想續約，其後官場盛傳，麒伯同政府早有默契，續約至少一年，但最後佢老人家都係唔再續約，當中談判究竟有乜轉折？

原來，今次嘅港台台長去留問題，主動權全掌握喺麒伯手中。據了解，商務及經濟發展局局長Rita劉吳惠蘭早已向麒伯表明，希望同佢續約，雖然麒伯期間做過通波仔手術，透露想告老歸田之意，但Rita冇停過游說佢留任。雙方來來回回反覆傾談，政府內部一度對麒伯留任頗有信心，諗住從來只有政府同人解約，點會有人主動放棄高官厚祿？只要麒伯肯留任多一個任期兩年半，港台台長換人呢個燙手山芋，自然就可拋畀下一屆政府啦！點知，世事難料，麒伯有錢唔賺，以健康為由拒絕，堅決明年二月約滿後離開。

相信連Rita都估唔到不但冧唔掂麒伯，反過嚟仲畀麒伯一腳踢開。事關跌眼鏡事小，失晒預算事大，尤其港台台長係一個好敏感嘅職位，Rita無可避免要處理招聘台長嘅問題，今次又睇吓佢點收科。