政情：莎姐明寸田二少博掌聲

早前又再「家變」嘅富貴黨尋日下晝喺九龍灣總部開集思會，黨內元老田北俊同「莎姐」周梁淑怡、主席劉健儀（Miriam）同地區骨幹共十八人出席。全面復出嘅田少，強調黨開拓地區路線不變，禮拜五會同莎姐落四區支部穩軍心，但唔評論對胞弟田北辰退黨嘅心情。Miriam就話未見退黨潮，但對田二少退黨不無怨言，指二少一向負責地區發展，突然出走，殘局有排執。

莎姐尋日上晝喺大氣電波直言，富貴黨同田二少仍係朋友，若田二少出選新界西，黨「唔會派人對撼」，而佢亦「暫時冇打算」再選，反而唔排除田少選新界東、Miriam轉戰直選。佢仲話點樣反枱都好，話晒田二少係田少胞弟，以前佢喺新界西經營開嘅地盤同樁腳，「自動轉帳」畀田二少，益呢個遠房親戚，總好過益建仔同工聯會呢啲名義盟友。呢啲就叫政治冇永遠嘅朋友或敵人，只有永遠嘅利益嘞！

對於田二少喺大家樂扣飯鐘錢事件上「中間偏左」，導致黨內分裂加劇，莎姐強調富貴黨係一個比較溫和嘅政黨，好多黨員唔認同田二少嘅罷食大家樂行動，「唔可以簡化式話人係無良僱主，我就係好人，咁係咪解決矛盾嘅辦法呢？如果你要博取掌聲，咁可能係嘅。」明寸田二少扮好人、博掌聲。

富貴黨提出直選同功能界別「兩條腿走路」方針行咗咁多年，左拐右拐，舉步維艱，估唔到依家處理田二少退黨事件，同樣又扶又砌，大大發揮「兩條腿走路」精神。