政情：蘇文駿助圓媽咪教育夢

「船王」包玉剛長女包陪慶，一直夢想要喺中國土地上建辦世界一流嘅學校，○七年同囝囝Philip蘇文駿喺上海創立嘅包玉剛實驗學校，出年將會增設寄宿制中學部，實行一條龍全人教育。Philip笑言依家嘅人工比佢讀大學做實習生嘅時候仲要低，不過可以同媽咪一齊完成夢想，佢又點會say no吖！

Philip八歲就開始接受寄宿教育，喺英國伊頓公學就讀嘅時候，獲得雙獎學金，升入牛津大學又獲首席秀才生榮譽，係全英國五位最優秀學生之一。讀書之外，運動佢亦耍家，仲曾經代表香港參加國際泳賽。張「成績表」咁靚仔，難怪佢深深體會到寄宿教育嘅好處，仲要將世界各地領先學術機構嘅教育思想同自己嘅經驗帶入學校。

Philip話媽咪對佢只有兩個要求，就係學好普通話同做一個好人，佢話當年去英國讀書，學校冇普通話班，媽咪喺北京請老師過去教，結果連帶其他同學都得益，所以佢自小就好認同媽咪嘅教育夢行得通。