政情：冷待運動員凱歸德成局長齋吹水

早幾日都講過，政府申辦二○二三年亞運會嘅諮詢期後日結束，而立法會民政事務委員會今日會搞個公聽會，民政事務局局長曾德成呢場大龍鳳搵咗好多廣州亞運會獲獎牌嘅港隊運動員出席，希望打民意牌壓住立法會內反對申亞嘅政黨。

自我催眠主場多金牌

而喺公聽會前夕，德成局長尋日撰文又再博懵擺班運動員上枱。佢話本港健兒可以喺今屆亞運創下八金佳績，係因為廣州算係香港「半個主場」；跟住又話喺○九年東亞運獎牌大豐收後，香港體院向運動員進行嘅調查顯示，百分之九十五運動員認為主場之利大大提升佢哋嘅表現。

嗱！大家嗒真啲，其實佢嘅潛台詞係話如果香港成功申亞，咁香港就有主場之利，金牌數量將會節節上升。咪住！廣州亞運好似冇一個比賽項目喺香港搞喎，香港何來係「半個主場」？與其話德成局長抽水，不如話佢用啲金牌自我催眠啦！

佢自我催眠早有前科，正如外界對舊年香港舉辦東亞運評價麻麻，更有唔少「甩轆」場面發生，但佢喺東亞運閉幕後，搶住出嚟話香港有資格申亞；其後，佢作申亞嘅推銷員，愈Sell愈差，搞到要延長諮詢期，又搞埋縮水版申亞開支方案，不停自我催眠以為申亞一定得，真係唔知佢幾時先識得醒！

雖然佢講到政府幾咁重視體育發展，更對本港默默耕耘嘅運動員予以無限支持，但轉過頭就冷待班運動員。尋日班運動員凱旋回歸時，政府不聞不問，唔單止冇舉辦任何歡迎會或祝捷會，連搵人去機場fing旗仔迎接都冇，搞到佢哋要自行拖行李搵的士。有唔願意透露姓名嘅亞運代表忍唔住呻話：「作為運動員我係支持申亞，但政府做嘅嘢我哋好失望，佢搞好多支持申亞嘅活動，搵我哋出嚟係『為做而做』，更有啲『擺我哋上枱』嘅感覺。佢哋安排晒好多嘢，只係一句通知，就要你跟住做，我覺得冇禮貌之餘，仲係對運動員唔尊重。」

近半學生唔入場打氣

德成局長尋日重申，希望立法會議員聽民意，唔好將申亞議題政治化。不過浸大最新嘅調查就發現，雖然有超過七成受訪中小學生支持申亞，但年級愈高支持申亞嘅比率就愈低，好似有九成小三學生支持申亞，但中五學生嘅支持比例卻急降至六成。最搞笑嘅係，有近半學生話，即使香港成功舉辦亞運，佢哋亦唔會到場為運動員打氣喎。連學生哥反應都咁冷淡，德成局長仲可以點撐？