醫護左右不分　必須從頭學起

喺不久嘅將來，醫學院同護士學校可能會加設一堂常識課，由幼稚園老師主教：「各位同學請跟我舉起雙手，呢邊係左，呢邊係右，錯嘞錯嘞，小明同學，你掉轉咗，來，再跟我做一次，左，右，左，右……」

咪以為太一叮講笑，醫護人員左右不分，確實需要惡補常識。呢，醫管局《風險通報》自我踢爆，一位男病人因為左肺積水，去公立醫院進行穿刺抽積水手術，點知醫生左右不分，居然篤穿病人右肺，雖然最後補刺左肺，但搞到右肺肺尖出現氣胸，真係無妄之災。

其實，呢啲烏龍事件已經唔係第一次發生嘅嘞。有位工人扭傷右腳去東區醫院開刀，結果醫生開錯左腳；有市民去公立醫院剝右上顎牙齒，呢次仲弊，牙醫唔止左右不分，連上下都搞錯，結果剝咗左下顎智慧齒。

病人被玩殘，死者亦不例外，沙田富山公眾殮房職員男女不分，將一位毋須解剖嘅女死者劏開，而本應解剖嘅男死者就原封不動，你話係咪搞笑吖。

不過咁，公共醫療亂象叢生，邊個笑得出呀。計埋其他斷錯症、開錯刀、輸錯血、派錯藥等等，公立醫院上半年總共發生二千八百五十九單大大小小嘅醫療事故，平均每日超過十五單，問你怕未！

太一叮思疑，近年公立醫院烏龍百出，愈錯愈離譜，唔知係咪同醫管局之前請咗蘇利民呢位洋總裁有關。雖然話外來和尚會唸經，但唸嚟唸去都係英文，同講中文嘅醫護人員雞同鴨講，卒之搞到醫生護士邏輯混亂，中英混淆，連前後上下左右男女都分唔到。

唔怪得蘇利民自己都覺得冇癮，掛冠求去啦。依家嘅問題係，洋總裁走咗，換咗本地薑梁栢賢接手，佢可唔可以撥亂反正仲係未知之數，但可以肯定嘅係，公立醫院錯漏百出，一個二個都要接受再培訓。

醫護人員要再培訓，有每周一鑊之稱嘅食物及衞生局局長周一嶽更加唔例外。太一叮發現，周一鑊久經官場醬缸浸泡，已經唔係醫生，而係變成一個如假包換嘅官僚，你話喇，佢需唔需要再培訓吖。

不過咁，就算周一鑊有機會做番醫生，睇怕都冇人夠膽畀佢醫。冇法子喇，佢惟有留喺醬缸，繼續渾渾噩噩，繼續每周一鑊，叮！