City Parade:有健康有事業
City Parade:有健康有事業
香港乳癌基金會本月二十日喺灣仔會展舉行五周年慈善晚宴，城中名媛齊齊宣揚驗身唔懶得嘅訊息，星光熠熠，溫馨滿溢。同一個晚上，雲集富豪級猛人嘅香港中華總商會，喺會展另一角落舉行新一屆會董就職禮，星級名人齊到賀，宴會廳坐滿二千位嘉賓。中總今年一百一十歲生日，江湖地位與日俱增，中總會長蔡冠深話會繼續推動個會邁向年輕化、國際化，躊躇滿志！
美女淑女同心籌款
前亞姐冠軍黎燕珊（左四）與一眾亞姐齊心為乳癌基金會籌款。 黃仲民攝
邱詠筠靚湯補身
邱詠筠（右）最愛飲媽咪（左）嘅愛心湯水補身。
查史美倫年年驗身
查史美倫（右）年年驗身，認真錫身，未知身旁嘅發展局局長林鄭月娥會否倣效？
王英偉模範老公
新進歌手王梓軒嘅爸爸王英偉（左）出名錫老婆，去Party總係有影皆雙。
黃宜弘攜眷出席
黃宜弘（左）係中總立法會代表，呢晚點少得佢同太太。
黃友嘉夠晒畀面
廠商會會長黃友嘉（左）同城大校長郭位（右）都嚟出席，認真畀面。
蔡冠深冧莊會長
唔少賓客向冧莊連任嘅中總會長蔡冠深（右三）送上祝賀，一眾副會長包括陳幼南（左一）、楊釗（左二）及方文雄（右一）齊致謝。 徐家浩攝
方文雄中總雙雄
中總副會長方文雄（左）與常務會董余鵬春（右）齊到賀。