政情：邊陳之娟搵長毛講和？
政情：邊陳之娟搵長毛講和？
現任香港女童軍總會總監邊陳之娟，早排畀人揭發違反年齡限制，超齡做總監，仲打算繼續競逐連任添。事件曝光後，社民連立法會議員「長毛」梁國雄先後三次喺立法會向民政事務局局長曾德成提出質詢。尋日我哋收到一條消息，聽落都幾有意思。
帶埋神職人員同行
消息話，邊太早幾日帶埋一個神職人員去見長毛，內容係希望長毛唔好再狙擊佢，類似放佢一條生路咁。我哋向長毛求證，佢承認見過邊太及其同行嘅神職人員，仲話唔係乜嘢求情，只係睇咗啲文件喎。佢仲話，呢個年代做乜都要公事公辦，依家邊太都冇得連任，只要執番正規矩就冇問題啦。
不過，長毛仍然話：「總之我一定跟進到底，直到搞清成件事為止！」我哋搵過女童軍總會公關，對方話聯絡唔上邊太，未有回應喎。
