政情：蔡堅引患癌新抱批醫保

屋企有病人，好多人都未必鍾意提，但醫學會會長蔡堅係性情中人，尋日佢出席一個醫療融資論壇時，講到政府硬銷嘅自願醫保計劃，要求私家醫院同醫生要實行套餐式收費，佢不惜攞患癌嘅新抱做例子，批評套餐收費根本行唔通。

蔡堅細仔今年十月十號結婚，不幸嘅係，婚後不足一個月、即係十一月九號，個新抱仔就摸到條頸有粒核，去老爺診所檢查，抽組織化驗，竟然發現患甲狀腺癌。蔡堅立刻安排新抱入港島區某私家醫院，請埋一位前教授操刀切瘤，醫生原本話四至五日就出得院，點知有併發症，手術時切埋條淋巴腺，依家傷口仲滲緊淋巴液，入院至今兩個禮拜都未出得院。

蔡堅話，好似新抱呢啲併發症，醫生手術之前都估唔到，套餐收費亦一定唔會包呢啲併發症嘅住院同醫療開支；如果包埋，間私家醫院隨時蝕本。

攞私人事嚟向政府同公眾痛陳利弊，蔡堅呢次真係用心良苦！