政情：搞搞政：霍公子騎劫阿寶順風車

廣州亞運尋晚閉幕，而本港申辦亞運會嘅諮詢期都進入尾聲，尋日立法會議員兼港協暨奧委會會長霍震霆喺個電台節目上，寫咗篇溫情洋溢嘅信畀單車好手黃金寶，霍公子由阿寶金牌失而復得，講到運動員要自我超越，城市都要自我提升，不被取代，仲話世上冇穩賺不賠嘅生意，講嚟講去都係為申亞拉客，睇佢死都要搭上阿寶嘅順風單車，就知申亞嘅民意支持度好麻麻啦。

政府近排啲攻勢真係好密，除聽日搵咗近十名啱啱喺廣州亞運攞牌嘅本地精英運動員出席立法會民政事務委員會公聽會外，霍公子同官員都分頭發功。霍公子尋日嘅信件就呼籲港人唔應該只睇眼前嘅帳面利益，咁樣只會一事無成。佢仲搬出柴九哥嘅名句「人生有幾多個十年」，強調香港應好好把握呢個千載難逢嘅機會。

不過，佢哋打感情牌又好、激將牌又好，似乎未能扭轉好多主流政黨同團體都唔支持大耗公帑搞亞運嘅意向，據講，多個一向力撐政府嘅建制派政黨同社團，私底下都唔撐申亞，即係話，無論班運動員喺亞運攞到幾多面金牌、喺立法會嘅發言幾咁感人、動聽，呢啲一向係政府擁躉嘅團體都會堅持企硬反對。