政情：許曉暉為公為私走四場
政情：許曉暉為公為私走四場
官場媽咪唔易做，尋日雖然係周末，但民政事務局副局長許曉暉（Florence）忙到要一口氣趕四場，既要做公務，又要抽時間現身囡囡嘅學校活動，最慘係仲要帶傷上陣，事關佢做廿四孝媽咪時整傷手。
Florence尋日下晝現身九龍城書節開幕禮，原來佢一早已出席一個電台節目，跟住兩個囡囡嘅學校舉行運動會，佢點都要捧場，幸好兩個女讀同一間學校啫，由於囡囡參加咗班際拔河比賽，肉緊嘅Florence不斷喺場邊打氣，最終囡囡同啲同學仔贏咗場比賽，不枉佢一場奔波。之後，佢又去咗馬鞍山一個家庭活動。
講講吓，見到佢右手拳頭上面貼咗塊膠布，原來上個禮拜佢同囡囡整蛋糕時，唔小心整親手，起咗個小水泡，所以到依家都要貼膠布。
許曉暉手背貼上膠布，原來係由於早前同囡囡整蛋糕時燙傷。
